20 ноября 2018 года, 09:54 (UTC+9:00) t в Якутске: -25 (06:00)

Государственное Собрание (Ил Тумэн)
Республики Саха (Якутия)

Официальный сайт

Александр Корякин: «Кыһалҕалаах кэмҥэ туора турбаппыт»

Александр Корякин: «Кыһалҕалаах кэмҥэ туора турбаппыт»
Александр Корякин: «Кыһалҕалаах кэмҥэ туора турбаппыт»
Александр Корякин: «Кыһалҕалаах кэмҥэ туора турбаппыт»
Александр Корякин: «Кыһалҕалаах кэмҥэ туора турбаппыт»
Александр Корякин: «Кыһалҕалаах кэмҥэ туора турбаппыт»
Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Александр Корякин улахан халаан алдьархайыгар түбэспит биир дойдулаахтарыгар, Амма улууһун дьонугар көмөлөһө, сүүрэ-көтө сылдьар Амматтан төрүттээхтэр түмсүүлэрин кыттыылаахтарын кытары көрүстэ.
 
Сис кэмитиэт бэрэссэдээтэлэ бүгүҥҥү күҥҥэ уу таһыма түспүтүн, маннык алдьархайга туора турбакка биир дойдулаахтар түмсүүлэрин үлэтэ былааннаахтык ыытылла турарын бэлиэтээтэ.
 
Амматтан төрүттээхтэр түмсүүлэрин кыттыылааҕа «Үрүҥ туллук» фонда салайааччыта Саргылана Неустроева мустубут дьоҥҥо көмө үлэ хаамыыта хайдах баран иһэрин билиһиннэрдэ. «Ыам ыйын 10 күнүгэр Саха циркатын дьиэтигэр биир дойдулаахтар түмсүүлэрин салайааччытын солбуйааччы Ньургуйаана Илларионова тэрээһининэн суһал мунньах ыытыллан, көмө буолар 11 киһилээх штаб тэриллибитэ. Боротокуолга суруллубут сэттэ хайысханан Дьокуускай куоракка Короленко уулусса № 25-дээх дьиэтигэр 2 этээскэ улуус салалтатын кытта биир ситимнээхтик сөҥнөһөн үлэлии олоробут. Бу күннэргэ дьон-сэргэ туттар мал-сал, аһыыр ас, эмп-томп, таҥас-сап, үп-харчы аҕалан туттардылар. Күннэтэ биир дойдулаахтар эдэрдиин, кырдьаҕастыын туора турбакка штабка дьуһуурустубалаан үлэлииллэр. Айыы киһитэ аһыныгас, күн киһитэ көмүскэс диэн сахаларга бэргэн этии баар. Дьоммутугар күүс-көмө буолуоҕуҥ», - диэн Саргылана Александровна этиитин түмүктээтэ.
 
Амматтан төрүттээх биир дойдулаахтар түмсүүлэрин салайааччытын солбуйааччы Ньургуйаана Илларионова бэлиэтээбитинэн, дьон кыһалҕаны өйдөөн, утары баран туох баарынан көмөлөһөр, тэриллибит анал штаб бу ыйга толору үлэлиир.
 
Култуура тэрээһиннэригэр эппиэттээх Александра Сибирякова кэпсээбитинэн, аһымал концертара буолуохтара. Ыам ыйын 29 күнүгэр «Сэргэлээх уоттара» култуура киинигэр эстрада артыыстара кыттыылаах «Аммаларга ис сүрэхтэн» аһымал концерт, ыам ыйын 31 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр «Тапталлаах Аммабыт туһугар түмсүөҕүҥ амарах санаанан» Екатерина Новикова – Дьулуура айар киэһэтэ, бэс ыйын саҥатыгар Б. Ойуунускай аатынан Саха академическай театрыгар «Сааскы кэм» спектакль, Олоҥхо театрын спектакла, циркэҕэ Христофор Максимов фондатын кэнсиэрэ ыытыллыахтара.
 
Тэрээһин кэмигэр аһымал дьааһык үлэлиэҕэ, киирии билиэт харчыта ууттан эмсэҕэлээбит Амма улууһун дьонугар ананыаҕа.
 
Сис кэмитиэт бэрэссэдээтэлэ Александр Корякин салгыы штаб үлэтигэр өй-санаа, тирэх буолан бары бииргэ үлэлиэҕиҥ, ыаллыы сытар Уус Маайа улууһугар көмө буолуоҕуҥ диэн ыҥырда. Мунньахха түмсүбүт дьон аһымал үлэни өссө күүһүрдэн, миэстэтигэр хара үлэҕэ волонтер этэрээтэ тэриллэригэр күүс-көмө буоларга диэн биир санаалаах тарҕастылар.
 

Ил Түмэн пресс-сулууспата

Опубликовано: 16.05.2018 16:49 (UTC +9:00)
Просмотров: 490
X
Ошибка в тексте:
Сообщить об ошибке администратору? Ваш браузер останется на той же странице