20 июля 2018 года, 19:46 (UTC+9:00) t в Якутске: +23.7 (18:00)

Государственное Собрание (Ил Тумэн)
Республики Саха (Якутия)

Официальный сайт

Александр Жирков : «Өймөкөөҥҥө олох оннун булар»

Александр Жирков : «Өймөкөөҥҥө олох оннун булар»
Александр Жирков : «Өймөкөөҥҥө олох оннун булар»
Александр Жирков : «Өймөкөөҥҥө олох оннун булар»
Ил Түмэн Бэрэссэдээтэлэ Александр Жирков ыам ыйын 14-15 күннэригэр Өймөкөөн улууһугар сырытта. Кини улуус социальнай-экономическай туругун билистэ, сүрүн болҕомтотун сааскы уу кэлиитигэр бэлэмнэнии үлэҕэ уурда.
 
Александр Жирков ыам ыйын 14 күнүгэр улуус салалтата, тэрилтэ салайааччылара кыттыылаах мунньаҕы салайан ыытта. Өймөкөөн улууһун баһылыга Михаил Захаров, Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников, улуус депутаттарын Сэбиэтин бэрэссэдээтэлэ Татьяна Алферова уонна да атыттар улуус социальнай-экономическай туругун, олохтоох дьону промышленнай тэрилтэлэргэ үлэҕэ ылыы, тулалыыр эйгэ, туризм туһунан кэпсээтилэр.  
 
Урут-уруккуттан өрөспүүбүлүкэҕэ промышленность сайдыытыгар Өймөкөөн сиртэн хостонор баайа киэҥник биллэр. Улууска кыһыл көмүһү, сурьманы о.д.а айылҕа баайын хостуур тэрилтэлэр таһаарыылаахтык үлэлииллэр. Олохтоох дьон-сэргэ ынах, сылгы, таба иитэн тыа хаһаайыстыбатынан утумнаахтык дьарыктанар.
 
Александр Жирков этиитигэр 90-с сылларга олох оҥкула уларыйан Өймөкөөн улууһугар улахан ыһыллыы-тоҕуллуу буолбутун, бириискэлэр, көмүсчүттэр олорбут бөһүөлэктэрэ сабыллан тыһыынчанан киһи олохсуйбут сирдэрин быраҕан, көһөн барарга күһэллибит кэмнэрин аҕынна.
 
«Ол ыарахан кэми биһиги бары өйдүүбүт, умнубаппыт», - диэтэ Ил Түмэн спикерэ. Онтон билигин, баҕарбыппыт курдук түргэнник да буолбатар, кырдьаҕас Өймөкөөн сиригэр олох сыыйа оннун булан, тупсан иһэр. Нэһилиэнньэ ахсаана сүнньүнэн тэҥнэстэ, саҥа үлэ көрүҥнэрэ баар буоллулар, улуус да, Уус Ньара бөһүөлэгэ да кырата суох дохуоттаннылар. Өрөспүүбүлүкэ салалтата инникитин даҕаны бу тэтими өйүөҕэ. Өймөкөөн – биһиги өрөспүүбүлүкэбит биир бөдөҥ промышленнай оройуона, ону сэргэ манна олохтоох дьон сүүһүнэн сылларга уутуйан олороллор».
 
Ил Түмэн Бэрэссэдээтэлэ мунньах кыттыылаахтарын болҕомтотун улуус инники кэскилин түстүүргэ олохтоох нэһилиэнньэ кыттыытын күүһүрдэргэ туһаайда.
 
«Өймөкөөҥҥө инникитин хайа промышленноһа, сир баайын хостооһун салгыы кэҥиэхтэрэ. Манна олохтоох дьон туора туран хаалаллара сатаммат. Ону таһынан атын улуустартан, ордук тыа сириттэн ыччаты тардыахха. Олохтоох ыччат промышленность эйгэтигэр сыһыннаҕына, манна тэҥҥэ үлэлэһэр, салайсар буоллаҕына эрэ биһиги Сахабыт сирин баайын бэйэбит дьаһайсыахпыт. Ойоҕоһуттан көрөн олорон ордугурҕааһын туһата кыра, ончу да суох. Улуус салалтата олохтоох кадрдары иитиигэ балайда тэрээһиннээхтик ылсыбыт.  Маны өйүөххэ, кыахта биэрэн иһиэххэ», - диэн Александр Жирков оройуон актыыбын мунньаҕар анаан-минээн эттэ.
 
Салгыы Ил Түмэн спикерэ 2018 сыл өрөспүүбүлүкэҕэ дьарыктаах, үлэлээх буолуу сылынан биллэриллибитин бэлиэтээтэ. «Маныаха сүрүн хайысханан эмиэ тыа ыччатын промышленноска сыһыарыы, кинилэр олохторун эйгэтин уларытыы буолар. Бу күннээҕи дьаллык буолбатах, унньуктаах, өр сыллаах үлэ. Ил Түмэн уонна Бырабыыталыстыба Саха ыччатын промышленноска көһөрөн үлэлэтэр туһунан Мирнэй, Нерюнгри, Мэҥэ Хаҥалас, Сунтаар улуустарыгар промышленнай тэрилтэлэр салайааччыларын ыҥыран туран хас да сүбэ мунньахтары ыытта, улуустар уонна промышленнай тэрилтэлэр икки ардыларыгар дуогабардар түһэрсиллэллэр. Бу үлэҕэ Өймөкөөн эмиэ кыттыахтаах», - диэтэ Ил Түмэн спикерэ.
 
Александр Жирков Саха ыччатын промышленноска үлэлэтиигэ аналлаах Ил Түмэн уонна Бырабыыталыстыба көһө сылдьар мунньаҕын бу дьыл сэтинньи-ахсынньы ыйдарыгар Өймөкөөн улууһугар тэрийэргэ сорудах биэрдэ.
 
Спикер улуус дьаһалтата, улуус депутаттарын Сэбиэтэ сөптөөхтүк дьаһанан үлэлии олороллорун, үөрэх тэрилтэтин үлэһиттэрэ учууталлар, иитээччилэр иитэр-үөрэтэр таһымнара үрдүгүн бэлиэтээтэ. Үүнэр көлүөнэ төрөөбүт дойдутун ураты айылҕатынан, дириҥ култууратынан, баай историятынан киэн тутта улаатарыгар баҕа санаатын эттэ.
 
Ыам ыйын 16 күнүгэр Ил Түмэн Бэрэссэдээтэлэ Александр Жирков Саха Өрөспүүбүлүкэтин Бырабыыталыстыбатын Бэрэссэдээтэлэ Евгений Чекинныын, Россия Федерациятын ыксаллаах быһыыга-майгыга Саха Өрөспүүбүлүкэтигэр кылаабынай управлениетын начальнига Павел Гаринныын, айылҕа содулун сэрэтиигэ, туоратыыга, баһаартан куттал суох буолуутун хааччыйыыга бырабыыталыстыба хамыыһыйатын чилиэннэрин кытта Дьокуускай куорат, Мэҥэ Хаҥалас, Нам, Уус Алдан улуустарыгар халаан уутун туругун билсэ көтүүгэ сырытта.   
 
Ил Түмэн пресс-сулууспата
Опубликовано: 17.05.2018 17:44 (UTC +9:00)
Просмотров: 481
X
Ошибка в тексте:
Сообщить об ошибке администратору? Ваш браузер останется на той же странице