21 апреля 2018 года, 05:21 (UTC+9:00) t в Якутске: -3 (03:00)

Государственное Собрание (Ил Тумэн)
Республики Саха (Якутия)

Официальный сайт

Александр Жирков Дүпсүн уонна Хапчаҕай олохтоохторун Саҥа Дьылынан эҕэрдэлээтэ

Александр Жирков Дүпсүн уонна Хапчаҕай олохтоохторун Саҥа Дьылынан эҕэрдэлээтэ
Александр Жирков Дүпсүн уонна Хапчаҕай олохтоохторун Саҥа Дьылынан эҕэрдэлээтэ
Александр Жирков Дүпсүн уонна Хапчаҕай олохтоохторун Саҥа Дьылынан эҕэрдэлээтэ
Александр Жирков Дүпсүн уонна Хапчаҕай олохтоохторун Саҥа Дьылынан эҕэрдэлээтэ
Александр Жирков Дүпсүн уонна Хапчаҕай олохтоохторун Саҥа Дьылынан эҕэрдэлээтэ
Александр Жирков Дүпсүн уонна Хапчаҕай олохтоохторун Саҥа Дьылынан эҕэрдэлээтэ
Саҥа Дьыл үүнүөн иннинэ, ахсынньы 31 күнүгэр, Саха Өрөспүүбүлүкэтин Ил Түмэнин Бэрэссэдээтэлэ Александр Жирков Уус Алдан улууһун Дүпсүн нэһилиэгин олохтоохторун кытта көрүстэ. Бырааһынньыктааҕы көрсүһүү Василий Никифоров-Күлүмнүүр аатынан кииҥҥэ буолла. Аҕыйах хонуктааҕыта, ахсынньы 29 күнүгэр, «В.В.Никифоров-Күлүмнүүр аатынан Дүпсүннээҕи оҕо технопаарката” өрөспүүбүлүкэтээҕи эбии үөрэхтээһин тэрилтэтин тэрийэр туһунан Саха Өрөспүүбүлүкэтин Бырабыыталыстыбатын 1661 №-дээх дьаһала таҕыста.
 
Россия Федерациятын Президенэ Владимир Путин дойдуга Оҕо саас уон сылын биллэрэн турар. Манна сөп түбэһиннэрэн, итиэннэ өрөспүүбүлүкэҕэ эбии үөрэхтээһини сайыннарар инниттэн Саха Өрөспүүбүлүкэтин Ил Дархана Егор Борисов Саха сиригэр оҕо технопааркаларын ситимин – кванториуму тэрийэр туһунан дьаһалын олоххо киллэриигэ үлэ барар. Ол биир туоһутунан Дүпсүҥҥэ саҥа объект тутуллан, үүммүт сыл олунньутуттан аһыллан үлэтин саҕалыаҕа.
 
Күлүмнүүр аатынан саҥа кииҥҥэ мустубут нэһилиэк олохтоохторун эҕэрдэлииригэр Александр Жирков бу курдук бэлиэтээн эттэ: «Омук быһыытынан инникибитин, тылбытын-өспүтүн, культурабытын, үгэспитин тутуһууга аан бастаан биһиги бэйэбит кыһаллыахтаахпыт. Тыа сиригэр дьон тардыһар, олороругар сөптөөх усулуобуйаны оҥоруохпутун баҕарар буоллахпытына, бу маннык аныгылыы тутуулаары киллэриэхтээхпит. Маныаха эһиги бэйэҕит күүскүтүнэн, өйгүтүнэн-санааҕытынан көмөлөһүөхтээххит, өйөбүл буолуохтааххыт. Бу саҥа объегы өрөспүүбүлүкэ таһымнаах оҥорору хара маҥнайгыттан туруорсубуппут, онтубутун ситистибит, дьон үлэлээх буолуутугар саҥа штаттары көрдүбүт.  Ити курдук быйылгы сылга улуус сайдарын туһугар үлэбит балайда үтүө түмүктээх буолла. Олортон биир суолталаахтара -- Саха сирин норуоттарын VIII спортивнай оонньууларын 2022 сылга Уус Алдаҥҥа ыытарга дьаһал таҕыста. Ити улуус дьаһалтатын, спортивнай уопсастыбаннаһын сыралаах үлэтинэн ситиһилиннэ. Инники өттүгэр бу үлэ кэскиллээх буолуоҕа.  Саҥа спортивнай объектары тутуу туһунан программа ылыллыаҕа, ол барыта улууска сайдыы барыытыгар өрөспүүбүлүкэ тирэх буолар кыаҕа үөскээтэ. Улуус билиҥҥи салалтатын, баһылык Алексей Васильевич Федотовы, кини хамаандатын бу маны дьулуурдаах үлэтинэн ситиспитинэн эҕэрдэлиэҕиҥ.
 
Ааспыт сыл хас биирдиибитигэр туох эрэ ситиһиилээх, туох эрэ кыайтарбатах, ситтэрбэтэх түгэннэрдээх, үөрүүлээх-хомолтолоох, кыайыылаах-хотторуулаах, ол гынан баран, саамай сүнньэ, биһиги биир сиргэ таах олорон, туран биэрбэтибит, төһө кыайарынан иннибит диэки хамсыы сатаатыбыт. 2018 сылы биһиги иннибитигэр дьулуурдаах, күүстээх санаалаах, дьоммутугар-сэргэбитигэр туһалыыр, оҕолорбутугар кэскиллээх, үтүө санаалаах көрсөбүт. Бука барбытыгар оннук буоллун. Ил Түмэн, өрөспүүбүлүкэ салалтатын уонна тус бэйэм ааппыттан ытык-мааны Дүпсүн дьонун бука барыгытын 2018 сылынан истиҥник эҕэрдэлиибин, дьоллоох буолуҥ», -- диэтэ спикер.  
 
Александр Жирков “Саха сирэ Россияны кытта 385 сыл» үбүлүөйдээх бэлиэни Дүпсүн учаастагын балыыһатын кылаабынай бырааһа Прасковья Алексееваҕа, «Кэскил» хомусчуттар ансаамбылларын салайааччыта, РФ уопсай үөрэхтээһинин бочуоттаах үлэһитэ, СӨ үөрэхтээһинин туйгуна, методист-учуутал, Дүпсүн нэһилиэгин бочуоттаах олохтооҕо Мария Соловьеваҕа, Дүпсүн орто оскуолатын историятын музейын салайааччыта, РФ уопсай үөрэхтээһинин бочуоттаах үлэһитэ, СӨ үөрэхтээһинин туйгуна, методист-учуутал, Дүпсүн нэһилиэгин бочуоттаах олохтооҕо Анна Атласоваҕа, муниципальнай сулууспа ветерана, СӨ норуотун хаһаайыстыбатын үтүөлээх үлэһитэ, Дүпсүн нэһилиэгин бочуоттаах олохтооҕо Дмитрий Свешниковка, Ил Түмэн Бэрэссэдээтэлин Махтал суругун Бээдитээҕи «Куруку» култуурунай-спортивнай комплекс дириэктэрэ Матрена Бочкареваҕа туттарда. Маны сэргэ нэһилиэк оҕо саадтарыгар «Олонхо эйгэтэ оҕо оонньууругар» куукулалар комплектарын бэлэхтээтэ.
 
Нэһилиэк баһылыга Ивамар Соловьев Дүпсүн сиригэр кэнчээри ыччат үөрэнэригэр, үүнэригэр-сайдарыгар кыах үөскээбитин, бу манна нэһилиэк дьоно бары субуотунньуктан саҕалаан, өй-санаа түмүллүүтүнэн көмөлөспүттэрин санатта уонна өрөспүүбүлүкэ, улуус салалтатыгар, чуолаан Александр Жирковка, Алексей Федотовка махтанна.
 
Уус Алдан улууһун баһылыга Алексей Федотов эҕэрдэ тылыгар манныгы бэлиэтээтэ: «Үс сыллааҕыта бу манна саҥа объект баар буолуо диэн баҕа санаабытын этиммиппит, ону ситиһэргэ  үтүмэн үлэ барда. Өрөспүүбүлүкэ Бырабыыталыстыбатыгар, Ил Дархаммыт Егор Борисовка, нэһилиэк салалтатыгар Дмитрий Свешниковка, Ивамар Соловьевка, итиэннэ бу бырайыагы саамай бастакыттан сыал-сорук туруорунан, биһиэхэ барбытыгар сорудах биэрэн, күүстээх үлэни иилээбит-саҕалаабыт, сүрүннээбит биһиги депутаппытыгар Александр Николаевичка Жирковка махтанабыт. Бу манна дьоммут-сэргэбит санаата түмүллүбүтүгэр үлэбит түмүктээх буолла.  Онон Саҥа Дьылбытын ис сүрэхтэн үөрүүбүтүн үллэстэн көрсөбүт. Бу курдукөйдөһөн-өйөһөн бигэ туруктаах буолуоҕун».  
 
Бу күн Александр Жирков Мэҥэ Хаҥалас улууһун Дойдуунускай нэһилиэгэр сырытта. «Кыһыл Маяк» ХЭТ үлэҕэ киллэрбит 60 миэстэлээх саҥа хотонун көрдө, үлэһиттэри кытта кэпсэттэ. Салгыы  култуура киинигэр нэһилиэк олохтоохторун кытта көрсөн, сыл түмүктэрин таһаарда, Ил Түмэн ыыппыт үлэтин кэпсээтэ уонна нэһилиэк олоҕун кытта билистэ. Спикер олохтоохторго Саҥа Дьылынан эҕэрдэтин, үтүө баҕа санаатын тириэртэ.
 
Саха сирэ Россия састаабыгар киирбитэ 385 сылынан үбүлүөйдээх бэлиэни Дойдуунускай нэһилиэк баһылыга Федор Федоровка, Ил Түмэн Бэрэссэдээтэлин Махтал суругун Дойдуунускай алын сүһүөх оскуола-саадын учуутала Иннокентий Романовка, физкультура уонна спорт ветерана Григорий Дьяконовка-Кычкиҥҥа туттарда.
 
Ил Түмэн пресс-сулууспата 
Опубликовано: 1.01.2018 23:21 (UTC +9:00)
Просмотров: 970
X
Ошибка в тексте:
Сообщить об ошибке администратору? Ваш браузер останется на той же странице