20 сентября 2019 года, 22:01 (UTC+9:00) t в Якутске: 1 (21:00)

Александр Жирков Москватааҕы М.С. Щепкин аатынан Үрдүкү театральнай училище устудьуоннарын кытта көрүстэ

Саха Өрөспүүбүлүкэтин Ил Түмэнин бэрээссэдээтэлин бастакы солбуйааччы Александр Жирков балаҕан ыйын 10 күнүгэр Москватааҕы М.С. Щепкин аатынан Үрдүкү театральнай училище устудьуоннарын ахсааннарыгар быйыл саҥа киирбит Саха сириттэн сылдьар оҕолору кытта көрүстэ.

 

Көрсүһүүгэ преподавателлэр уонна устудьуоннар бааллара: профессор, артыыс идэтигэр уһуйааччы, саха артыыстарын бэһис бөлөҕүн үөрэппит Татьяна Аносова, педагог, саха оҕолоругар куратор Аля Кизилова, өрөспүүбүлүкэттэн талыллан кэлбит барыта 23 устудьуон – 14 уол уонна 9 кыыс.

 

Александр Жирков талыллан киирбит хас биирдии устудьуоҥҥа сүбэ-ама биэрдэ. Саха тыйаатырын кэскиллээх сарсыҥҥытын, тыйаатыр сайдыытыгар бэйэлэрин кылааттарын киллэрбит тумус туттар дьоммут туһунан кэпсээтэ.

 

Эһиил Москватааҕы М.С. Щепкин аатынан Үрдүкү театральнай училищены кытта Саха сирэ доҕордуу сыһыаҥҥа биир ситимнээхтик үлэлээбитэ номнуо 70 сылын туоларын туһунан Александр Николаевич иһитиннэрдэ. Онуоха «бастакы көлүөнэ щепкинецтэргэ» билигин үөрэнэ сылдьар устудьуоннар ааттарыттан эҕэрдэ быһыытынан бэлэм үлэлэрдээх кэлэллэригэр санаатын үллэһиннэ.

 

М.С. Щепкин аатынан Үрдүкү театральнай училище «Актерское искусство» хайысхатыгар барыта 23 оҕо Саха сирин араас улуустарыттан бастакы кууруска үөрэнэр. Төһө даҕаны нуучча театральнай кыһатыгар үөрэнэ сылдьан, сахалыы ырыаны-тойугу умнубакка, саха тылын-өһүн, төрүт үгэһин, култууратын мэлдьи өрө тутан үүнэллэригэр-сайдалларыгар, ситиһиилээхтик үөрэнэллэригэр Александр Жирков алгыс тылын эттэ.

 

Ил Түмэн пресс-сулууспата

 

Опубликовано: 10 сентября, 2019 - 17:13
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице