18 декабря 2017 года, 00:42 (UTC+9:00) t в Якутске: -39.2 (21:00)

Государственное Собрание (Ил Тумэн)
Республики Саха (Якутия)

Официальный сайт

Антонина Григорьева: «Норуот историята үйэлэргэ олоҕурарын туһугар, санаабытын, күүспүтүн түмэн бииргэ үлэлиэҕиҥ»

Антонина Григорьева: «Норуот историята үйэлэргэ олоҕурарын туһугар, санаабытын, күүспүтүн түмэн бииргэ үлэлиэҕиҥ»
Антонина Григорьева: «Норуот историята үйэлэргэ олоҕурарын туһугар, санаабытын, күүспүтүн түмэн бииргэ үлэлиэҕиҥ»
Антонина Григорьева: «Норуот историята үйэлэргэ олоҕурарын туһугар, санаабытын, күүспүтүн түмэн бииргэ үлэлиэҕиҥ»
Антонина Григорьева: «Норуот историята үйэлэргэ олоҕурарын туһугар, санаабытын, күүспүтүн түмэн бииргэ үлэлиэҕиҥ»
Антонина Григорьева: «Норуот историята үйэлэргэ олоҕурарын туһугар, санаабытын, күүспүтүн түмэн бииргэ үлэлиэҕиҥ»
Антонина Григорьева: «Норуот историята үйэлэргэ олоҕурарын туһугар, санаабытын, күүспүтүн түмэн бииргэ үлэлиэҕиҥ»
Ахсынньы 6 күнүгэр, Ил Түмэҥҥэ Саха Өрөспүүбүлүкэтигэр музейдары сайыннарыы туһунан «Бырабыыталыстыба чааһа» ыытылынна. Мунньаҕы наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэт бэрэссэдээтэлэ Антонина Григорьева иилээн-саҕалаан ыытта.
 
«Бырабыыталыстыба чааһыгар» Ил Түмэн дьиэ кэргэҥҥэ, оҕоҕо, ыччакка, физическэй култуураҕа уонна спортка дьыалалар сис кэмитиэтин бэрэссэдээтэлэ Юрий Баишев, норуот депутаттара Иван Шамаев, Дмитрий Семенов, Саха Өрөспүүбүлүкэтин култуураҕа уонна духуобунай сайдыыга миниистирин солбуйааччы Николай Макаров, музей дириэктэрдэрэ, үлэһиттэрэ кыттыыны ыллылар.
 
Сис кэмитиэт бэрэссэдээтэлэ Антонина Григорьева мунньах саҕаланыытыгар, өрөспүүбүлүкэбит Уһук Илиҥҥи уокурукка элбэх музейдааҕынан бастакы миэстэҕэ сылдьарын тоһоҕолоон бэлиэтээтэ. «Бүгүҥҥү күҥҥэ судаарыстыбаннай ситимҥэ 27 филиаллаах 59 музей баар. Ил Дархан Ыйааҕынан үс музей өрөспүүбүлүкэ ураты харыстанар объектарыгар киирбиттэрэ: Емельян Ярославскай аатынан Хотугу норуоттар историяларын уонна култуураларын холбоһуктаах судаарыстыбаннай музейа, Национальнай художественнай музей уонна Суоттутааҕы «Доҕордоһуу» история, архитектура судаарыстыбаннай заповедник-музейа. Чөркөөхтөөҕү история музейа Бүтүн Россиятааҕы историяны, култуураны харыстыыр объектар ахсааннарыгар сылдьар», - диэн сырдатта.

Санатар буоллахха, былырыын 2016 сыл сэтинньи 21 күнүгэр «Саха Өрөспүүбүлүкэтигэр музейдары сайыннарыы» тула Парламент мунньаҕа ыытыллыбыта. Кэпсэтии түмүгүнэн салгыы туох, хайдах үлэ ыытыллыахтааҕын чопчулааһын буолбута. Ил Түмэн музейдар үлэлэрин тупсарарга ылыммыт уурааҕынан сыл устата үлэ хайдах барбытын, Саха Өрөспүүбүлүкэтин култуураҕа уонна духуобунай сайдыыга миниистирин солбуйааччы Николай Макаров иһитиннэрдэ. «Биһиги сыл устата ситимнээх үлэни ыыттыбыт. Музейдар чөл туруктаах буолалларыгар Култуура Министерствотыттан 10 мөлүйүөн харчы көрүллүбүтэ. Бу харчы Емельян Ярославскай аатынан Хотугу норуоттар историяларын уонна култуураларын холбоһуктаах судаарыстыбаннай музейыгар ананан өрөмүөн үлэтэ ыытылынна. Биир боччум үлэнэн өрөспүүбүлүкэбит музейдарын коллекциялара, экспонаттара сурукка киирэн, учуоттанан уопсай ситимҥэ тиһиллэ сылдьаллар. Судаарыстыба 2017 сыллааҕы программатыттан үп көрүллэн «КАМИС» диэн музей үлэтэ сайдарыгар туһуламмыт программаны  киллэрдибит. Саҥа программаны сырдатар, билиһиннэрэр сыаллаах үлэһиттэргэ анал семинар ыытыллыбыта. Саха Өрөспүүбүлүкэтин Бырабыыталыстыбатын уурааҕынан музей коллекцията кэҥииригэр үбүлээһин тыырыллыбыта, музей салалтата экспонат төһөҕө сыаналанарын бэйэтэ быһаарар. 2018 сылга үс музей өрөмүөннэнэригэр тустаах министерстволары кытары үлэлэһэбит. Быйыл «Россия – мин историям» мультимедийнэй историческэй паарка аһыллан үгүс дьон сэҥээриитин ылла. Быйылгы сылга дьон музейга сылдьыыта хаһааҥҥытааҕар да үрдүк көрдөрүүлээх», - диэн этиитин түмүктээтэ.
 
Емельян Ярославскай аатынан Хотугу норуоттар историяларын уонна култуураларын холбоһуктаах судаарыстыбаннай музейын научнай үлэҕэ салаатын сэбиэдиссэйэ Людмила Подпругина, быйыл музей эйгэтигэр хамсааһын барбытын, элбэх киһи сылдьар буолбутун бэлиэтээтэ. Саҥа киирбит «КАМИС» программаны сөптөөхтүк туһаныаҕыҥ, инникитин өссө саҥа технологиялар киирэллэригэр үлэ ыытыллара буоллар диэн санаатын эттэ.
 
Мунньах кыттыылаахтара музей үлэтэ сайдыытыгар болҕомто ууруллубутун иһин махталларын тириэртилэр уонна инникитин тохтоон хаалбакка үлэ тэтимнээхтик барыахтааҕын бэлиэтээтилэр. Баар экспонаттары харыстыыр систиэмэни тупсарарга эбии үп көрүллүүтүн, музейдарга саҥа техника наадатын, үлэһиттэр таһымнарын үрдэтэр сыаллаах үөрэх ыытыллыахтааҕын эттилэр. 2018 сыл ахсынньы бастакы күнүгэр диэри оскуолалар музейдарын пааспардааһын үлэтин түмүктүүрү, улуус музейдарын интернетынан толору хааччыйыыны туруорустулар.
 
Түмүккэ сис кэмитиэт бэрэссэдээтэлэ Антонина Григорьева Ил Түмэн «Саха Өрөспүүбүлүкэтигэр музейдары сайыннарыы» тула ыыппыт мунньаҕар мэктиэлэммит үлэлэр барыта туолбуттарын бэлиэтээн туран, Саха Өрөспүүбүлүкэтин култуураҕа уонна духуобунай сайдыыга миниистирин солбуйааччы Николай Макаровка, тустаах министерстволарга,өрөспүүбүлүкэ музейдарын дириэктэрдэригэр, үлэһиттэригэр махталын тириэртэ. Норуот историята үйэлэргэ олоҕурарын туһугар, санаабытын, күүспүтүн түмэн бииргэ үлэлиэҕиҥ диэн ыҥырда.
 
Ил Түмэн пресс-сулууспата  
 
Опубликовано: 7.12.2017 14:27 (UTC +9:00)
Просмотров: 138
X
Ошибка в тексте:
Сообщить об ошибке администратору? Ваш браузер останется на той же странице