13 декабря 2018 года, 18:52 (UTC+9:00) t в Якутске: -33.2 (15:00)

Государственное Собрание (Ил Тумэн)
Республики Саха (Якутия)

Официальный сайт

Бастакы съезд бэрэстэбиитэллээх уорганнар үлэлэригэр саҥа сүүрээни киллэриэҕэ

Бастакы съезд бэрэстэбиитэллээх уорганнар үлэлэригэр саҥа сүүрээни киллэриэҕэ
Гаврил Корякин, Бүлүү улууһун депутаттарын Сэбиэтин бэрэссэдээтэлэ:
 
- Биһиги Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын съеһигэр Бүлүү улууһуттан 25 делегат буолан сырыттыбыт. Улуус, нэһилиэк, куорат депутаттарын түмэр маннык улахан тэрээһин хаһан да буола илигиттэн, бастакы съезд ыытыллыытын чахчыта да кэтэстибит. Бэрэстэбиитэллээх уорганнарга сүрдээх элбэх тирээн турар проблема баар. Ол да иһин съезд кэмигэр буолбут семинардарга, «төгүрүк остуолларга» делегаттар бэйэлэрин санааларын күүскэ этиннилэр, тиэртилэр.
 
Съезд пленарнай мунньаҕар Саха Өрөспүүбүлүкэтин Ил Түмэнин Бэрэссэдээтэлэ Александр Жирков дакылаатын болҕойон иһиттибит уонна сэҥээрдибит. Дакылаакка этиллибит курдук, бүгүҥҥү күҥҥэ Саха сиригэр 34 улуус, 2 куораттааҕы уокурук баарыттан 21-гэр эрэ бэрэстэбиитэллээх уорган босхоломмут бэрэссэдээтэлэ бастайааннай төрүккэ үлэлиир. Оттон нэһилиэк таһымыгар, этэргэ дылы, тарбахха эрэ баттанар. Бу соччото суох көстүү. Ол иһин Александр Николаевич маны көннөрүөххэ наада диэн тоһоҕолоон бэлиэтээтэ. Кини депутат статуһун үрдэтиигэ болҕомто ууруллуохтааҕын, маныаха Ил Түмэн өттүттэн күүскэ хамсаныылар барыахтара диэн эттэ.
 
Квалификацияны үрдэтии курстарыгар ситэриилээх былаас уорганнарын үлэһиттэрэ эрэ буолбакка, бэрэстэбиитэллээх уорганнар депутаттара эмиэ кытта барыахтаахтар диэн дакылаакка ыйылынна. Ону таһынан Саха Өрөспүүбүлүкэтин салайар каадырын резервэтигэр бэйэлэрин көрдөрбүт депутаттары киллэриэххэ наада диэн спикер этиитин биһирээтим. Манна даҕатан эттэххэ,  нэһилиэктэргэ депутат буолууга харгыстар бааллар. Сорохтор ол иһин депутат буолуохтарын баҕарбаттар. Итиннэ дохуот туһунан декларацияны түһэрии эмиэ сабыдыаллыыр. Билиҥҥи кэмҥэ нэһилиэк баһылыктара бэйэлэрэ хас да дуоһунаһы тэҥинэн дьүөрэлииллэр. Ол нэһилиэк баһылыктарын миэстэтиттэн сыҕарытаары буолбакка, бэрэстэбиитэллээх уорган оруолун үрдэтээри босхоломмут бэрэссэдээтэл нэһилиэктэргэ баар буолуохтаах диэн санааҕа сөпсөһөбүт.
 
Делегациям дьоно съезд чэрчитинэн ыытыллыбыт бары тэрээһиннэргэ көхтөөхтүк кытынна. Бүлүү улууһун депутаттарын Культура уонна духуобунай сайдыы министиэристибэтигэр үчүгэйдик приемнаатылар. Делегаттар ааттарыттан биһиги Ил Түмэн Бэрэссэдээтэлэ Александр Николаевич Жирковка, Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Александрович Местниковка, тэрийэр кэмитиэккэ съезд үрдүк таһымнаахтык ааспытыгар улахан махталбытын тиэрдэбит. Бастакы съезд резолюцията Саха Өрөспүүбүлүкэтин бэрэстэбиитэллээх уорганнарын олохторугар элбэх саҥаны, сонун сүүрээннэри киллэриэҕэ диэн эрэнэбит.
 
Ил Түмэн пресс-сулууспата
Опубликовано: 1.04.2017 17:38 (UTC +9:00)
Просмотров: 715
X
Ошибка в тексте:
Сообщить об ошибке администратору? Ваш браузер останется на той же странице