24 августа 2017 года, 02:43 (UTC+9:00) t в Якутске: +12.8 (00:00)

Государственное Собрание (Ил Тумэн)
Республики Саха (Якутия)

Официальный сайт

Депутаттар оруолларын үрдэтиигэ туһуланна

Депутаттар оруолларын үрдэтиигэ туһуланна
Депутаттар оруолларын үрдэтиигэ туһуланна
Депутаттар оруолларын үрдэтиигэ туһуланна
Депутаттар оруолларын үрдэтиигэ туһуланна
Депутаттар оруолларын үрдэтиигэ туһуланна
Дьокуускайга ыытыллыбыт Саха Республикатын бэрэстэбиитэллээх органнарын депутаттарын бастакы съеһэ олохтоох салайыныы тиһигэр бэрэстэбиитэллээх органнар депутаттарын оруолларын уонна статустарын үрдэтиигэ туһуланна уонна Саха сирин историятыгар  ураты суолталаммыт Саха уобаластааҕы инородческай съезд аһыллыбыта 105 сылыгар, Сэбиэттэр бастакы Бүттүүн Саха сиринээҕи тэрийэр съезтэрин 95 сылыгар, Дьокуускай куораттааҕы Дума 195 сылыгар ананна.
 
Съезкэ бэлэмнэнии үлэлэр СР Государственнай Мунньаҕын (Ил Түмэн) председателэ А.Н.Жирков 2016 с. сэтинньи 23 күнүнээҕи 138№-дээх дьаһала тахсыаҕыттан ыла тэрээһиннээхтик ыытыллыбыттара.
 
Съезд үлэтигэр биһиги улууспутуттан 26 делегат оройуон Сэбиэтин Президиумунан, нэһилиэктэр Сэбиэттэрин сессияларынан талыллан кыттыыны ыллыбыт. Съезд программата олус киэҥ ис хоһоонноох, тэрээһинэ үрдүк таһымнаах буолла. “Олохтоох бэйэни салайыныы таһымыгар бырайыагынан салайыыны киллэрии” темаҕа депутаттарга аналлаах курс ыытылынна. Биһиги делегаттарбытыттан бу курска Лөгөй орто оскуолатын директора М.В.Петрова, Уус-Күөлүнээҕи “Сандал” сынньалаҥ киинин директора А.И.Аммосова, Уус-Алдан улууһун предпринимательствоны өйүүр фондатын директора Н.Н.Лукачевскай бырайыагынан салайыы ньымаларын киллэриигэ  билиилэрин үрдэтиннилэр.  
 
“Төгүрүк остуоллар” уонна семинар үлэлэригэр улууспутуттан сылдьар делегаттар бары аттарыллан активнай кыттыыны ыллыбыт. Тус бэйэм “Олохтоох салайыныы уонна гражданскай общество: бииргэ үлэлээһин ньымалара” “төгүрүк остуолга” “Уус-Алдан улууһун холобуругар олорор сиринэн бэйэни салайыныы тиһигин киллэрии” темаҕа, Найахы нэһилиэгин Сэбиэтин председателэ П.В.Румянцев “Бэрэстэбиитэллээх органнар үлэлэрин тэрийии боппуруостара” “төгүрүк остуолга” “Нэһилиэктэр бэрэстэбиитэллээх органнарын депутаттарын быыбарын ыытыыга биир мандаттаах уокуруктар тиһиктэрин киллэрии соруктара” темаларга дакылааттарынан кытынныбыт. Маны таһынан, “Муниципальнай үбү уонна баайы-дуолу салайыыга бэрэстэбиитэллээх органнар кыттыылара уонна оруоллара” темаҕа ыытыллыбыт семинарга нэһилиэктэр олохтоох суолталаах боппуруостары толорууга боломуочуйаларын үп-харчы өттүнэн хааччыйыы ситэтэ суох ыытылларын туһунан боппуруоска бэйэм санаабын үллэһинним. Ыытыллыбыт “төгүрүк остуоллар” уонна семинар олус интэриэһинэйдик буоллулар, туруоруллубут боппуруостары уонна кыһалҕалары делегаттар киэҥник ырытыстылар, дьүүллэстилэр, бэйэлэрин санааларын толору үллэстэн, рекомендацияларга этиилэри киллэрэн тарҕастылар.
 
Съезд пленарнай мунньаҕа СР Государственнай Мунньаҕын (Ил Түмэн) председателэ А.Н. Жирков киэҥ ис хоһоонноох дакылаатыгар республикаҕа олохтоох салайыныы тиһигэр бэрэстэбиитэллээх органнар уонна кинилэр депутаттарын үлэлэрин бүгүҥҥү туругар, государственнай былаас органнара кинилэр үлэлэрин тэрийиигэ уонна хааччыйыыга ыытар үлэлэригэр баар араас сыһыаннаһыылары ырытыыга, бу хайысхаҕа Ил Түмэн позициятын, көрүүлэрин уонна ылыллыахтаах дьаһаллар кэрискэлэригэр этиилэрэ болҕомтону тарта, интэриэһи үрдэттэ. Дакылаат ис хоһооно депутаттар оруолларын уонна статустарын үрдэтиигэ саҥа саҕахтары арыйарга туһуланна, кинилэр быыбардааччыларын иннигэр эппиэтинэстэрин үрдэтиигэ улахан соруктары туруорда.
 
Дакылааты уонна съезд резолюциятын СР Государственнай Мунньаҕын (Ил Түмэн) олохтоох салайыныы бэрэстэбиитэллээх органнарын кытта хардарыта бииргэ үлэлээһиннэрин Концепциятын бырайыактарын дьүүллэһиигэ биһиги делегациябыт аатыттан дьүүллэһиигэ кыттыыны ылан, этиибэр бэрэстэбиитэллээх органнар депутаттарын статустарын туһунан сокуон ылыллыыта наадалааҕын,  олорор сиринэн бэйэни салайыныы тиһигин поселение статуһа суох кыра бөһүөлэктэр таһымнарыгар киллэрии тоҕоостооҕор, боломуочуйалары тыырсыы боппуруоһун өссө ырытыһыы наадалааҕын, нэһилиэк таһымыгар депутаттары быыбардааһыны биир мандаттаах уокуруктарынан ыытыыны, нэһилиэктэр Сэбиэттэрин председателлэрин общественнай төрүккэ олоҕуран талыыны өйөөһүн боппуруостарын таарыйдым. Съезд резолюциятыгар үгүс этии киирбитинэн редакционнай бөлөх барытын учуоттаан, ырытан бигэргэтиигэ киллэрэригэр сорудахтанна.
 
Съезд программатын чэрчитинэн киэҥ ис хоһоонноох культурнай тэрээһиннэр ыытылыбыта  умнуллубат өйдөбүлү хаалларда. Делегаттарга анаан Суорун Омоллоон аатынан Опера уонна балет государственнай театрыгар, А.С.Пушкин аатынан Нуучча государственнай академическай драмтеатрыгар, П.А.Ойуунускай аатынан Саха академическай театрыгар спектакыллар, музейдарга, быыстапкаларга, туристическай комплекстарга экскурсиялар тэрилиннилэр. Биһиги делегациябыт П.А.Ойуунускай аатынан Саха академическай театрыгар В.В.Никифоров – Күлүмнүүр  «Манчаары» спектаклыгар сырыттыбыт.
 
Маны таһынан улуустар делегацияларын кытта республика министерстволара уонна ведомстволара анал бириэмэ анаан көрсүһүүлэри тэрийдилэр. Улууспут делегациятын СР транспорга уонна суол хаһаайыстыбатыгар министерствота көрүстэ. Министр С.В.Винокуров Лена пароходствотын аактабай саалатыгар көрсүһүүнү тэрийдэ, улууска суол, транспорт хайысхатыгар ыытылла турар киэҥ өрүттээх үлэни, инники былааннары билиһиннэрдэ, делегаттар үгүс боппуруостарыгар сиһилии эппиэттэри, быһаарыылары биэрдэ.
 
Эмиэ съезд программатыгар киллэриллэн улуустар уонна куораттар бэрэстэбиитэллээх органнарын депутаттарын VI-с Спартакиадалара «Кыайыы 50 сыла» спорт дыбарыаһыгар тэрээһиннээхтик ыытылынна.
 
Ити курдук, Саха Республикатын бэрэстэбиитэллээх органнарын депутаттарын бастакы съезтэрэ үрдүк тэрээһиннээхтик, улахан таһымҥа ыытылынна. Съезд түмүктэрэ олохтоох салайыныы тиһигэр бэрэстэбиитэллээх органнар үлэлэрин тэрийиигэ улахан историческай суолталаах буолуоҕа. Делегаттар съезд үлэтиттэн элбэҕи билэн-көрөн, саҥа соруктары туруорунан, инники үлэҕэ сонун туһаайыылары, хайысхалары киллэриэхтэрэ, депутаттар оруолларын, эппиэтинэстэрин үрдэтиигэ утумнаах, айымньылаах үлэҕэ турунуохтара  диэн эрэнэбит.
 
Иван КОЛОДЕЗНИКОВ, 
Уус Алдан улууһун бэрэстэбиитэллээх органын -- оройуон Сэбиэтин председателэ.   
Опубликовано: 18.04.2017 14:39 (UTC +9:00)
Просмотров: 687
X
Ошибка в тексте:
Сообщить об ошибке администратору? Ваш браузер останется на той же странице