20 августа 2018 года, 02:46 (UTC+9:00) t в Якутске: +15 (00:00)

Государственное Собрание (Ил Тумэн)
Республики Саха (Якутия)

Официальный сайт

Ил Түмэн Бэрэссэдээтэлэ Александр Жирков: сахалыы тылынан үөрэтии, пенсия уонна сэлии (мамонт) муоһун туһунан

Ил Түмэн Бэрэссэдээтэлэ Александр Жирков: сахалыы тылынан үөрэтии, пенсия уонна сэлии (мамонт) муоһун туһунан
Ил Түмэн спикерэ Александр Жирков бу ый 24 күнүгэр РФ Судаарстыбаннай Дууматыгар үлэлээтэ.
 
Ити күн Госдума пленарнай мунньаҕар «Россия Федерациятыгар үөрэх туһунан» сокуонугар төрөөбүт тыллары үөрэтиигэ уларытыылары киллэрии туһунан сокуон барыла иккис ааҕыыга ылынылынна. Госдума депутаттара РФ сокуонугар национальнай республикалар уонна манна олохтоох омуктар төрөөбүт тьлларынан үөрэнэллэрин федеральнай үөрэх стандарта толору хааччыйар диэн Саха сирин парламена киллэрбит этиитин ылыннылар.
 
Урут иһитиннэриллибитин курдук, бу сокуон барылын Дума көрүүтүгэр бэлэмниир аналлаах кэмитиэт мунньаҕар сүүрбэччэ Госдума депутаттарын (ол иһигэр Г. Данчикова) этиилэрэ уонна атын субъектартан этии киирбэтэҕинэн, РФ бары субъектарыттан сыччах Саха республикатын парламенын көннөрүүлэрэ эрэ көрүллүбүттэрэ уонна сүрүн этиилэрэ өйөммүттэрэ.
 
Александр Жирков үөрэх сокуонугар Ил Түмэн тэрийбит комиссията үлэтин тохтоппот, «Россия Федерациятыгар үөрэх туһунан» сокуон бүтэһиктээхтик ылынылыннаҕына Саха сирин үөрэх туһунан сокуонугар төрөөбүт тылынан үөрэнии туһунан балаһыанньалары бөҕөргөтөргө салгыы үлэлиэҕэ диэн эттэ.
 
Ити күн республика парламенын бэрэссэдээтэлэ РФ-ҕа пенсияны анааһын уонна төлөөһүн туһунан сокуоннарга уларытыылары дьүүллэһиигэ кытынна. Дойдуга үгүс мөккүөрү тардыбыт бу боппуруоска биһиги республикабыт парламена Саха сиригэр пенсияҕа тахсар сааһы эбэри утаран, устунан бу сокуону утарбыт Россия 12 субъегын ахсааныгар киллэрилиннэ.
 
Ил Түмэн спикерэ республика парламенын этиилэрин Госдума пленарнай мунньаҕар бэлэмнээһиҥҥэ Госдума депутаттарын кытта холбоһорго этии киллэрдэ. Сүбэлэһии түмүгүнэн пенсия сокуонугар Ил Түмэн этиилэрэ икки хайысханан: быһаччы Ил Түмэн аатыттан, уонна Госдума депутаттарын кытта холбоһуктаах этиилэр быһыыларынан бэлэмнэнэн Госдума тустаах комитетын көрүүтүгэр киириэхтээхтэрэ бигэргэннэ. Билиҥҥи кэмҥэ Саха сирин парламенын хотугу сирдэргэ пенсияҕа тахсар сааһы уруккутунан хаалларар туһунан этиитин өйүүр туһунан уонтан тахса Госдума депутата санаатын биллэрдэ.
 
«Биһиги сүрүн этиибит чопчу уонна уларыйбат, - диэтэ Александр Жирков. – Хоту сир тыйыс уратыларын аахсан, уонна РФ Президенэ В.В. Путин Арктика уонна Дальнай Восток сирдэрин күүскэ сайыннарыы, манна дьону олохсутуу туһунан сорудахтарыгар олоҕуран хоту сиргэ олохтоох, үлэлиир дьоҥҥо, аҕыйах ахсааннаах хотугу норуоттары киллэрэн туран пенсияҕа тахсар саастарын оннуларынан хаалларыы, хоту сирдэргэ пенсияҕа олохтоммут чэпчэтиилэри салгыы олохтооһун». Ил Түмэн спикерэ Саха парламенын этиилэрин республикаттан Госдума депутаттара Галина Данчикова, Федот Тумусов, Александр Акимов, Вячеслав Штыров партиянан эҥин хайдыспакка өйүүллэригэр, үлэлэһэллэригэр ыҥырда. Манна даҕатан, быйыл күһүн республика Ил Дарханын, Ил Түмэн депутаттарын, улуус, нэһилиэк таһымнарыгар быыбардар буолалларынан сорох депутакка кандидаттар уонна суруналыыстар пенсия сокуонугар республика туруорсуутун Республика салалтатын бэйэтин утары эргитэ сатыылларын Ил Түмэн спикерэ сиэрэ-майгыта суох, быстах үлүмнэһиинэн ааттаата.
 
Ил Түмэн көҕүлээһининэн Пенсия сокуонун барылыгар Саха сирин этиилэрин тула Дальнай Восток уонна РФ хотугу субъектарын түмэр үлэ ыытыллар. «Бу үлэ сайын да, күһүн да тохтотуллуо суоҕа. Пенсия тула мөккүөр уустуктаах, уһун буолуоҕа. Биһиги онно бэлэм буолуох тустаахпыт», - диэтэ Ил Түмэн спикерэ.
 
Эмиэ бу күн РФ «Сир аннын» туһунан сокуонугар Саха сиригэр сэлии (мамонт) муоһун хостооһун туһунан Республика парламенын туруорсуутун Госдумаҕа хайдах табыгастаахтык көрүүгэ туруорар туһунан сүбэлэһии буолла. Госдумаҕа субъектартан киирбит сокуон барылларын көрүү бэрээдэгин быһыытынан, сокуон барыла бастаан тустаах консультативнай экспертнай сэбиэккэ көрүллэр, онтон онно өйөбүлү ыллаҕына, салгыы Госдума сэбиэтигэр киирэн үлэҕэ ылыллар, өйөнүөн сөп буолар.
 
Көрсүһүү түмүгүнэн Саха сирин этиилэрин депутат Галина Данчикова нөҥүө экспертнай сэбиэккэ аһарарга сүбэлэстилэр. Бу сэбиэт председателэ Госдума депутата Елена Панинаҕа этиилэри салгыы мунньахха таһаарбакка, сэбиэт чилиэннэрин сирэй илии баттааһыннарынан (опроснай илиис оҥорон) быһаарарга этии оҥоһулунна. Ил Тумэн спикерэ Александр Жирков: «Урукку өттүгэр сэлии муоһун хостуур уонна туһаҕа таһаарар туһунан биһиги сокуон ылыммыппыт. Ону прокуратура бырачыастаабыта. Түмүгэр, билигин Саха сиригэр сэлии муоһа хостонор уонна илииттэн илиигэ атыыга барар. Саха сирэ мантан туһаммат, нолуок киирбэт, муос сыаната түһэр, криминал мустар, биһиги олохтоох маастардарбыт, анал үөрэх тэрилтэлэрэ сэлии муоһунан хааччыллыбаттар. РФ «Сир аннын» туһунан сокуонугар уларытыылары киллэрэр туһунан Саха сирин этиилэрэ ити мэһэйдэри суох гынарга туһуланаллар. РФ сокуонугар тустаах уларыйыы киирдэҕинэ, биһиги бэйэбит сокуоммутун сөргүтэр кыах үөскүөҕэ», - диэн эттэ.
 
Ити күн Ил Түмэн спикерэ дойдутугар Саха сиригэр көттө.
 
 
Ил Түмэн хаһыат корреспондена Людмила Ноговицына
  
Опубликовано: 26.07.2018 18:47 (UTC +9:00)
Просмотров: 994
X
Ошибка в тексте:
Сообщить об ошибке администратору? Ваш браузер останется на той же странице