15 октября 2019 года, 02:03 (UTC+9:00) t в Якутске: -8 (03:00)

Кэскили кэҥэтэр «Кэнчээри» оҕо саадын саҥа дьиэтэ үлэҕэ киирдэ

Ньурба улууһун Күндээдэ нэһилиэгэр алтынньы 8 күнүгэр үөрүүлээх түгэн буолла. 1954 сылтан үлэлии турар «Кэнчээри» уһуйаан киэҥ тэлгэһэтигэр сабыс саҥа, аныгылыы тутуулаах, 50 миэстэлээх, дьэрэкээн көстүүлээх таас дьиэ тутуллан, олохтоохтор, төрөппүттэр, уһуйаан үлэһиттэрэ баҕа санаалара туолан, үөрүү өрөгөйүн биллилэр. Ыраахтан-чугастан ыалдьыттар муһуннулар.

 

Тэрээһини Таркаайы нэһилиэгин бочуоттаах олохтооҕо, үлэ бэтэрээнэ Алиса Михайловна Иннокентьева сахалыы сиэринэн-туомунан, алгыһынан аста. СӨ култууратын туйгуна Г.П.Степанова салайар Арассыыйа образцовай «Кэскил» оҕо ансаамбыла чороонноох үҥкүүнү толордо.

 

Ньурба оройуонун баһылыга Алексей Иннокентьев, СӨ Судаарыстыбаннай Мунньаҕын (Ил Түмэнин) вице-спикерэ Антонина Григорьева, «Региональнай сайдыы» ХЭТ Ньурбатааҕы тэрилтэтин салайааччыта Альберт Васильев, СӨ үөрэххэ уонна наукаҕа министиэристибэтинээҕи ресурснай хааччыйыы киинин дириэктэрэ Василий Петров, улуустааҕы үөрэҕирии управлениетын салайааччыта Алевтина Аргунова, уһуйаан салайааччыта Венера Степанова кыһыл лиэнтэни үөрүүлээх быһыыга-майгыга быстылар.

 

Дьыссаат дьиэтин болдьоммут бириэмэтигэр ситэрэн-хоторон үлэҕэ киллэрбит «Региональнай сайдыы» ХЭТ Ньурбатааҕы тэрилтэтин салайааччыта Альберт Васильев символическай дьиэ күлүүһүн уһуйаан салайааччытыгыгар Венера Ивановнаҕа үөрүүлээх түгэҥҥэ туттарда.

 

Салгыы ыалдьыттары, мустубут дьону оҕо уһуйаанын саалатыгар ыҥырдылар. Күндээдэ нэһилиэгин баһылыга Юрий Васильев эҕэрдэ тыл эттэ, тутааччыларга, чуолаан, улуус баһылыгар А.М.Иннокентьевка, ИСУ салайааччытыгар М.С. Семеновка, үөрэҕирии управлениетын салайааччытыгар А.П.Аргуноваҕа махтанарын биллэрдэ.Оройуон дьокутааттарын Сэбиэтин бэрэссэдээтэлэ Сергей Евсеев, кэлбит ыалдьыттар эҕэрдэ тыл эттилэр, үөрүүлээх быһыыга-майгыга уһуйааҥҥа үлэлээн ааспыт бэтэрээннэргэ махтал суруктары туттардылар. Уһуйаан кырачаан иитиллээччилэрэ хоһоон аахтылар, ырыа ыллаатылар, үҥкүү толордулар.

 

 

Антонина Семенова

Опубликовано: 9 октября, 2019 - 10:30
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице