22 июня 2018 года, 16:10 (UTC+9:00) t в Якутске: +19.6 (15:00)

Государственное Собрание (Ил Тумэн)
Республики Саха (Якутия)

Официальный сайт

Россия үтүөлээх тренерэ Иван Сивцевы чиэстээтилэр

Россия үтүөлээх тренерэ Иван Сивцевы чиэстээтилэр
Россия үтүөлээх тренерэ Иван Сивцевы чиэстээтилэр
Россия үтүөлээх тренерэ Иван Сивцевы чиэстээтилэр
Россия үтүөлээх тренерэ Иван Сивцевы чиэстээтилэр
Россия үтүөлээх тренерэ Иван Сивцевы чиэстээтилэр
Россия үтүөлээх тренерэ Иван Сивцевы чиэстээтилэр
Кулун тутар 9 күнүгэр Уус Алдан Бороҕонугар көҥүл тустууга улуус чемпионата буолла. Бу күрэхтэһии өрөгөйдөөх түгэнинэн киэн туттар биир дойдулаахтара, Россия Федерациятын, Саха Өрөспүүбүлүкэтин үтүөлээх тренерэ, Уус Алдан улууһун бочуоттаах гражданина Иван Николаевич Сивцевы 60 сааһынан чиэстээһин буолла.
 
Иван Николаевич - уһулуччулаах тренер Дмитрий Петрович Коркин иитиллээччитэ. Кини үлэтин утумнааччы быһыытынан бэриниилээх, дьулуурдаах, уһун сыллаах үлэтинэн саха тустуутун сайдыытыгар улахан кылаатын киллэрбитэ, үгүс сыратын уурбута. Иван Сивцев иитиллээччилэрэ – Иван Данилов, Иван Пантилов, Егор Охлопков, Семен Ноговицын, Дмитрий Михайлов, Николай, Ньургун Чукровтар, Александр Контоев, Прокопий Петров, Антон Иванов, Осип Михайлов, Айаал Лазарев, Семен Семенов, Андрей Бекренев уо.д.а. саха норуотун киэн туттуулара.
 
Билиҥҥи кэм биллиилээх тренерин эҕэрдэлии ыраахтан-чугастан ыалдьыттар, өрөспүүбүлүкэ тренердэрэ, Иван Николаевич ииппит-таһаарбыт хас да көлүөнэ бөҕөстөрө муһуннулар.
 
Иван Сивцевы үбүлүөйүнэн Саха Өрөспүүбүлүкэтин Ил Түмэнин Бэрэссэдээтэлэ Александр Жирков эҕэрдэлээтэ. “Сыл-хонук диэн мээнэҕэ эппэттэр. Иван Николаевичтыын биһиги оҕо сааспыт биир бөһүөлэккэ, биир сайылыкка, биир тиэргэҥҥэ ааспыта. Кини миигиттэн икки сыл балыс. Аҕата Николай Николаевич Сивцев үйэтин тухары бурдук үүннэриитинэн дьарыктаммыта, нэһилиэкпитигэр аан бастакынан “Үлэ Кыһыл Знамята” ордены ылбыта”, -- диэн эҕэрдэ тылы оҕо саас кэмнэриттэн саҕалаата.
 
Салгыы спикер Иван Николаевич эдэр сылдьан тустуук быһыытынан улахан ситиһиилэммитин, ССРС спордун маастара буолбутун аҕынна. Онтон  тренер быһыытынан талаана өссө арыллан, бэриниилээхтик үлэлээн, чэпчэки ыйааһынтан саҕалаан муҥутуур ыарахан ыйааһыҥҥа тиийэ аан дойду таһымыгар биллэр маастардары ииппитин бэлиэтээтэ. Олор истэригэр сахалартан аан бастакынан 125 кг Олимпиадаҕа кыттыбыт Айаал Лазаревы холобур аҕалла. Иван Николаевич дьону тустууга көҕүлүүр ураты дьоҕурдааҕын, аҥардас бэйэтин түөлбэтиттэн, Бэйдиҥэттэн, аан дойду кылаастаах икки маастары Иван Пантиловы, Егор Охлопковы иитэн таһаарбытын санатта.
 
«Бүгүн манна учууталларын, тренердэрин чиэстии, махтал тылларын этэ Олимпиада түһүлгэлэригэр кыттыбыт, Азия, Россия чемпионнара, үтүөлээх маастар, үтүөлээх тренер буолбут үөрэнээччилэрэ муһуннулар. Иван Николаевич 60 сааһын бэлиэтиир күнүгэр тапталлаах, ахтылҕаннаах дойдутугар, биир дойдулаахтарыгар илии тутуурдаах, өттүк харалаах, утары уунардаах кэлэн турар. Маны барытын кини түөрт уонча сыл устата сыралаах үлэтинэн ситиспитэ. Онон биһиги Иван Николаевиһы дьоһун сааһынан  бары сүһүөхпүтүгэр туран дохсун ытыс тыаһынан эҕэрдэлиэҕиҥ, махтаныаҕыҥ», -- диэтэ спикер.
 
Александр Жирков 2022 сылга Бороҕоҥҥо буолуохтаах Саха сирин VIII спортивнай оонньууларын көрсө үлэ саҕаламмытын санатта. Маныаха уус алданнар бу өрөспүүбүлүкэ саамай улахан күрэхтэһиитин сатаан тэрийээччи эрэ быһыытынан буолбакка, таһымнаах спортсменнары бэлэмнээн кытыннарарга болҕомто ууруохтаахтарын эттэ. Ол үлэҕэ бу Иван Николаевич курдук киэн туттар тренердэрбит, өбүгэ саҕаттан сураҕырбыт кус быһыйдар,ат бөҕө дьоммут, албан ааттаах спорстменнарбыт, бөҕөстөрбүт сырдык сулус буоллуннар диэн алгыс тылын эттэ.
 
Аан дойду икки төгүллээх чемпиона Виктор Лебедев: «Мин спортка ситиһиим, үтүөлээх маастар буолуум -- Иван Николаевич өҥөтө. Кини наһаа ирдэбиллээх, үлэтигэр олус бэриниилээх, биһиги иитиллээччилэрэ кинин олус ытыктыыбыт, киэн туттабыт», -- диэн эттэ.  
 
Тыл эппит үөрэнээччилэрэ Иван Николаевич салалтатынан дьарыктаммыттарын, алтыһалларын олохторун дьолунан ааҕыналларын, кыра эрдэхтэриттэн аҕалыы амарах санаатынан, мындыр сүбэтинэн, сиэрдээҕин, тулуурдаах, эппиэтинэстээх, ирдэбиллээх сыһыанынан спорстмен, киһи быһыытынан иитиллэн тахсыыларыгар улахан сабыдыаллааҕын иһин ис сүрэхтэриттэн махтаннылар.         
 
Дьоро күн истиҥ эҕэрдэлэрин үтүөлээх тренергэ Уус Алдан улууһун баһылыга Алексей Федотов, нэһилиэктэр баһылыктара, СӨ Тустууга федерациятын президенэ, Ил Түмэн депутата Семен Березин, СӨ спортка миниистирин солбуйааччы Александр Бугаев, СӨ үрдүкү спортивнай маастарыстыба оскуолатын дириэктэрэ Александр Игнатьев  уо.д.а. тиэртилэр.
 
Ил Түмэн пресс-сулууспата 
Опубликовано: 11.03.2018 15:03 (UTC +9:00)
Просмотров: 502
X
Ошибка в тексте:
Сообщить об ошибке администратору? Ваш браузер останется на той же странице