21 сентября 2019 года, 14:50 (UTC+9:00) t в Якутске: 0 (09:00)

Максим Аммосов туһунан “Многонациональный Кыргызстан: одна Родина на всех” диэн кинигэҕэ сурулунна

Кыргызтаҥҥа “Многонациональный Кыргызстан: одна Родина на всех” диэн кинигэ бэчээттэнэн таҕыста. “Интербилим” диэн Норуоттар икки ардыларын Киин таһаарбыт кинигэтэ бу дойдуттан төрүттээх эбэтэр онно үлэлээн ааспыт, республика историятыгар, культуратыгар умнуллубат суолу хаалларбыт араас омук дьонун туһунан ааҕааччыга билиһиннэрэр.
 
“Биһиги дойдубутугар 80-тан тахса араас омук олорор. Кинилэр таһаарыылаах үлэлэрин түмүгэ биһиги Кыргызтаммыт чэчирии сайдарыгар сүдү улахан суолталаах”, - диэн кинигэ киирии тылыгар суруллубут.
 
Максим Аммосов туһунан очерк  кинигэ бастакы “Норуот хаһан да умнуо суоҕа” диэн ааттаах баһыгар киирдэ. Кинини сэргэ манна гражданскай сэрии аатырбыт полководеһа Михаил Фрунзе, кыргыз-нуучча тылдьытын айбыт Константин Юдахин курдук, онтон да атын биллиилээх дьон туһунан бэрт сиһилии кэпсэнэр. Манна даҕатан эттэххэ, М.К. Аммосовтан ураты Советскай Союз кэминээҕи Кыргызтан салайааччыларыттан биир даҕаны киһи бу кинигэҕэ киллэриллибэтэх.
 
Максим Аммосов Кыргызтаҥҥа баара суоҕа аҕыс эрэ ый үлэлээбитэ. Кылгас кэм иһигэр Максим Кирович саҥа үөскээбит советскай республика сайдар суолун торумнаспыта, сүнньүнэн тыа хаһаайыстыбатынан дьарыктанар дойду индустриальнай-аграрнай республикаҕа кубулуйар оҥкулун оҥорбута. М.К. Аммосов бу дойду экономиката, культурата сайдарыгар бэйэтин баай уопутун, чаҕылхай тэрийэр талаанын, күүһүн-уоҕун биэрэн туран үлэлээбитэ, государственнай үлэҕэ олохтоох кадрдары күүскэ киллэрбитэ, оттон репрессия ыар сылларыгар бу дьонун бэйэтин да харыстаммакка көмүскэспитэ. Ол иһин Максим Кирович Аммосов аатын бүгүҥҥэ диэри Кыргызтан дьоно-сэргэтэ умнубат”, - диэн бу кинигэ тахсыытын туһунан Кыргызтаҥҥа М.К. Аммосов аатын үйэтитиигэ аналлаах тэрээһиннэри салайбыт Ил Түмэн вице-спикерэ Александр Жирков бэйэтин санаатын үллэһиннэ.
 
Кини этэринэн, “Многонациональный Кыргызстан: одна Родина на всех” диэн кинигэ бэчээттэниитэ М.К. Аммосов төрөөбүтэ 115 сыла туолуутугар аналлаах тэрээһиннэри түмүктүүр дьоһун докумуон. Былырыын ахсынньы 7 күнүгэр Бишкек куоракка М.К. Аммосовка пааматынньык туруоруллубута, кини туһунан документальнай киинэ уһуллубута, Кыргызтан национальнай библиотеката Саха сирин туһунан кинигэлэринэн байытыллыбыта.
 
Билигин кыргызтар саха улуу эпическай айымньытын олоҥхону бэйэлэрин тылларыгар тылбаастыы сылдьаллар. Онтон кыргызтар Манастарын канонизированнай вариана сахалыы тылбаастанар. Ити курдук икки уруулуу омуктар хардарыта көдьүүстээх сибээстэрэ салҕанар.
 
Екатерина Попова
 
 
 
 
Опубликовано: 23 сентября, 2013 - 14:44
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
^ Наверх ^
X
Ошибка в тексте:
Сообщить об ошибке администратору? Ваш браузер останется на той же странице