20 ноября 2018 года, 01:39 (UTC+9:00) t в Якутске: -24.9 (00:00)

Государственное Собрание (Ил Тумэн)
Республики Саха (Якутия)

Официальный сайт

Депутаттар баай-дуол уонна сир сыһыаннаһыыларын миниистиринэн Евгения Григорьева ананарыгар сөбүлэҥнэрин биэрдилэр

Депутаттар баай-дуол уонна сир сыһыаннаһыыларын миниистиринэн Евгения Григорьева ананарыгар сөбүлэҥнэрин биэрдилэр

Саха Республикатын народнай депутаттара ыам ыйын 17 күнүгэр Ил Түмэн сүүрбэ сэттис уочараттаах пленарнай мунньаҕар Саха Республикатын президенигэр баай-дуол уонна сир сыһыаннаһыыларын миниистиринэн Евгения Григорьева ананарыгар сөбүлэҥнэрин биэрдилэр.

Ыам ыйын 16 күнүгэр Ил Түмэн бюджеккэ, үпкэ, түһээн уонна сыана политикатыгар, бас билии уонна приватизация боппуруостарыгар уонна экономика, инвестиция уонна промышленность политикатыгар, урбааҥҥа уонна туризмҥа сис кэмитиэттэрин холбоһуктаах мунньахтарыгар бу икки кэмитиэт чилиэннэрэ баай-дуол уонна сир сыһыаннаһыыларын миниистиринэн Евгения Григорьева ананарыгар парламент сөбүлэҥин биэрэригэр мэктиэни ылыммыттара.

Саха сирин президенэ Егор Борисов Ил Түмэн пленарнай мунньаҕар депутаттарга Евгения Григорьева биографиятын билиһиннэрдэ, туох үтүөлээҕин, үлэтин хайысхаларын туһунан иһитиннэрдэ. Президент Евгения Григорьева миниистири бастакы солбуйааччынан үлэлииригэр сир боппуруостарынан, государственнай бас билиини учуоттааһынынан, бас билиини регистрациялааһынынан, сири кадастрынан учуоттааһынынан дьарыктаммытын этэн туран, кини муниципальнай тэриллиилэри, федеральнай киини кытта үлэлииргэ улахан опыттааҕын бэлиэтээтэ.

Ил Түмэн экономика, инвестиция уонна промышленность политикатыгар, урбааҥҥа уонна туризмҥа сис кэмитиэтин бэрэссэдээтэлэ Александр Уаров: «Евгения Васильевна дьаһаллаах уонна кэскиллээх салайааччы быһыытынан улааппытын биһиги бары көрө-билэ сылдьабыт», - диэн өйөөн эттэ.

Евгения Григорьева Ил Түмэн депутаттарын иннигэр тыл этэригэр кэнники сылларга үлэлиир министиэристибэтэ туох ситиһиилэммитин, итиэннэ туох-ханнык соруктар инники туралларын иһитиннэрдэ.

Киниттэн Саха сирин народнай депутаттара Михаил Филиппов, Оксана Винокурова, Александр Ким-Кимэн, Ньургун Тимофеев республика бас билиитин инвентаризациялааһын, нэһилиэнньэни быраап өттүнэн хааччыйыы, тыа хаһаайыстыбатыгар аналлаах сири көдьүүстээхтик туһаныы боппуруостарыгар сыһыаннааҕы ыйыттылар.

Депутаттар фракцияларын ааттарыттан Виктор Губарев, Ольга Федорова, Константин Ильковскай, Александр Ким-Кимэн тыл эттилэр.

Кистэлэҥ куоластааһын түмүгүнэн республика парламена Саха Республикатын президенигэр баай-дуол уонна сир сыһыаннаһыыларын миниистиринэн Евгения Григорьева ананарыгар сөбүлэҥнэрин биэрдилэр.

Ил Түмэн пресс-сулууспата

Опубликовано: 17.05.2011 17:08 (UTC +9:00)
Просмотров: 1114
X
Ошибка в тексте:
Сообщить об ошибке администратору? Ваш браузер останется на той же странице